UrduReporter Daily World News in Urdu, اردونیوز , اردوخبریں

ايبٹ آباد : مين بازار ميں پانچ گودام اور پانچ دکانيں جل کر خاکستر

bukhari — Wed, 22 Feb 2012 10:23:54 +0000

ايبٹ آباد … ايبٹ آباد کے مين بازار ميں ايک ہوٹل اور مٹھائي کي دکان کي بالائي منزل ميں اچانک آگ بھڑک اٹھي، جس نے جلد ہي ديگر عمارتوں کو اپني لپيٹ ميں لے ليا.ايبٹ آباد کے مين بازار ميں منگل کي رات آٹھ بجے ايک مقامي ہوٹل اور مٹھائي کي دکان کي بالائي منزل ميں آگ بھڑک اٹھي جس نے ديکھتے ہي ديکھتے ملحقہ دکانوں کو بھي لپيٹ ميں لے ليا.آگ بجھانے کيليے مقامي رضاکار اور فائر بريگيڈ کے عملے نے موقع پر پہنچ کر آگ بجھانے کي کوششيں شروع کيں.آگ زيادہ اور گلياں تنگ ہونے کے باعث آگ بجھانے ميں پريشاني کا سامنا کرنا پڑا.تقريبا دو گھنٹوں کي کوششوں کے بعد آگ پر قابو پاليا گيا، تاہم اس دوران کپڑوں اور جوتوں کے پانچ گودام اور پانچ دکانيں مکمل طور پر جل گئيں.واقعے ميں کوئي جاني نقصان نہيں ہوا.

قرآن کی بیحرمتی، افغانیوں کا احتجاج جاری

bukhari — Wed, 22 Feb 2012 10:05:05 +0000

امریکی فوجیوں کی طرف سے قرآن پاک کی بے حرمتی کے خلاف افغان عوام کی طرف سے دوسرے روز بھی احتجاج جاری ہے۔ برطانوی خبررساں ادارے کے مطابق ہزاروں شہری افغان دارالحکومت کابل، جلال آباد پر جمع ہوئے اور انہوں نے نیٹو اور افغان فوجیوں پر پتھراؤ کیا۔ فوجیوں نے شہریوں کو منتشر کرنے کے لیے فائرنگ کی۔ مظاہرین امریکا مردہ باد، کرزئی مردہ باد کے نعرے بلند کررہے تھے۔ واضح رہے کہ امریکی فوجیوں نے بگرام ائیربیس میں ایک گاڑی میں رکھے قرآن مجید اور دیگر اسلامی کتب کو نذرآتش کر دیا تھا۔ افغان ملازمین کے ذریعے یہ بات باہر نکلی جس پر احتجاج شروع ہوگیا۔ نیٹو نے واقعہ پر معافی مانگتے ہوئے تحقیقات کرانے کا اعلان کیا ہے اور کہا ہے کہ ذمہ داروں کو قرار واقعی سزا دی جائے گی۔

ایران: جنداللہ کے چار دہشتگرد ہلاک کرنیکا دعویٰ

bukhari — Wed, 22 Feb 2012 10:01:08 +0000

تہران: ایرانی سکیورٹی فورسز نے ایک کارروائی کے دوران جند اللہ کے چار دہشتگردوں کو ہلاک کرنے کا دعویٰ کیا ہے۔ ایرانی میڈیا رپورٹ کے مطابق سکیورٹی فورسز نے تازہ کارروائی جنوبی صوبہ سستان میں کی اس کامیاب آپریشن میں جند اللہ کے چار دہشتگردوں کو ہلاک کر دیا گیا جبکہ آپریشن کے دوران سکیورٹی فورسز کا ایک اہلکار بھی ہلاک ہوا۔ واضح رہے کہ جند اللہ کے دہشتگردوں کی کارروائیوں میں اب تک سینکڑوں افراد ہلاک ہوچکے ہیں۔ دسمبر دو ہزار گیارہ میں جنوب مشرقی شہر چار بہار میں جند اللہ کے ایک حملے میں کم از کم اٹھتیس افراد ہلاک اور اٹھانوے زخمی ہوئے تھے۔

اُبلا پانی۔ یرقان سے بچائو

bukhari — Tue, 21 Feb 2012 07:59:25 +0000

ماہرین صحت نے کہا ہے کہ پانی ابال کر استعمال کرنے سے یرقان سمیت پانی سے ہونے والی تمام بیماریوں سے بچا جاسکتا ہے۔ یرقان سے بچائو کی حفاظتی تدابیر اور اس پر قابو پانے کے حوالے سے ایک پروگرام میں اظہار خیال کرتے ہوئے ڈاکٹر عبدالحمید اور ڈاکٹر سید سیف الرحمن نے کہا کہ یرقان کی پانچ اقسام ہیں جن میں اے بی سی ڈی اور ای شامل ہیں۔ یرقان اے اور ای گندے پانی کے استعمال کی وجہ سے ہوتا ہے ۔
ڈاکٹر عبدالحمید نے کہا کہ یرقان کی علاقات میں جسم میں ہلکا درد ہونا’ ہلکا بخار ہونا’ متلی ہونا’ پیٹ میں درد’ آنکھوں کا زرد ہونا اور پائوں سوجھ جانا شامل ہیں۔ انہوں نے کہا کہ یرقان ایک خاموش قاتل ہے اور اس کی علامات ظاہر ہونے میں پانچ سے سات سال کا عرصہ لگتا ہے۔ انہوں نے کہا کہ اس بیماری میں ایک سے دو فیصد بال گرتے ہیں۔ انہوں نے کہا کہ ویکسین ڈرگ کو دو سے آٹھ ڈگری درجہ حرارت پر رکھنا چاہیے کیونکہ نارمل درجہ حرارت پر اسے خراب ہونے کا خطرہ ہے۔ ڈاکٹر سیف نے کہا کہ پاکستان میں یرقان کی بنیادی وجہ اس بیماری کے بارے میں آگاہی کی کمی ہے اور عام طور پر لوگ اس طرف دھیان نہیں دیتے جس سے یرقان کے جراثیم جسم میں داخل ہوتے ہیں۔ ان کی وجوہات میں استعمال شدہ بلیڈ اور سرنج’ گندے ہاتھ اور خون کی منتقلی بھی شامل ہے۔

سینیٹ میں بیسویں آئینی ترمیم کثرت رائے سے منظور

bukhari — Tue, 21 Feb 2012 07:55:11 +0000

سینیٹ سے 20 ویں آئینی ترمیم کثرت رائے سے منظور کرلی گئی، 74 ارکان نے حمایت جبکہ 2 نے مخالفت کی، صدر اور وزیراعظم نے 20 ویں آئینی ترمیم کی منظوری پر قوم کو مبارکباد دی۔ وزیراعظم نے کہا کہ 20 ویں ترمیم کرکے انتخابات کو قابل بھروسہ بنا دیا، اب کسی کو انتخابات پر اعتراض نہیں ہوگا۔ سینیٹ کے اجلاس سے خطاب کرتے ہوئے وزیراعظم نے کہا 20 ویں ترمیم کی منظوری سے جمہوریت کو استحکام ملا جس پرسینیٹ اور پوری قوم کو مبارکباد پیش کرتا ہوں، انہوں نے کہا کہ 1973ء کاآئین بنا تو اس وقت مشرقی پاکستان جدا ہوچکا تھا اور یہ آئین پاکستان کے استحکام اور سالمیت کا ضامن ہے۔ جس میں صوبائی خودمختاری کو یقینی بنایا گیا ہے۔ انہوں نے کہا کہ 18 ویں، 19ویں اور 20 ویں ترامیم پر پارلیمانی کمیٹی کو خراج تحسین پیش کرتا ہوں اب ماضی کی غلطیوں کی درستگی ہوچکی ہے۔ انہوں نے کہا کہ اس سے قبل نگران حکومتوں میں وزیراعظم باہر سے لائے جاتے تھے اور جو کرسی پر بیٹھا ہوتا تھا اس کی مرضی ہوتی تھی لیکن اب یہ وزیراعظم اور اپوزیشن لیڈر کی مشاورت سے ہوگا۔ اب صدر کے اختیارات ختم ہوگئے ہیں۔ وزیراعظم نے کہا کہ موجودہ حکومت کو 4 سال اس لئے ملے کہ 58 ٹو۔ بی کا اختیار ختم کر دیا گیا، ہم آئین کو مکمل بحال کرنا چاہتے ہیں اور ہم نہیں چاہتے کہ کوئی ایسی ترمیم لائے جس پر ہمیں کل اپوزیشن میں بیٹھ کر ندامت کا سامنا کرنا پڑے۔ انہوں نے کہا کہ اب انتخابات صاف اور شفاف ہوں گے اور کسی کو اعتراض کا موقع نہیں ملے گا اور جو منتخب ہوگا اس کی قدر ہوگی،انہوں نے کہا کہ ہم تمام صوبوں کو برابر حقوق دینا چاہتے ہیں۔ ترمیم قائد ایوان سید نیئر حسین بخاری نے ایوان میں پیش کی جس کی تین مرحلوں میں منظوری لی گئی۔ ترمیم کی منظوری کیلئے ایوان میں موجود 74 اراکین نے حمایت جبکہ جماعت اسلامی کے 2 سینیٹرز پروفیسر خورشید اور پروفیسر ابراہیم نے مخالفت میں ووٹ دیا۔

افغانستان: جیپ کو حادثہ، 3 اطالوی فوجی ہلاک

bukhari — Tue, 21 Feb 2012 07:47:51 +0000

افغانستان کے صوبے ہرات میں اطالوی فوجیوں کی جیپ الٹنے کے باعث تین فوجی ہلاک وہ گئے۔ غیرملکی خبررساں ادارے کے مطابق حکام نے بتایا ہے کہ صوبہ ہرات میں اطالوی فوجیوں کی جیپ کو یہ حادثہ اس وقت پیش آیا جب وہ حادثے کی شکار ایک دوسری گاڑی کی مدد کے لئے تیز رفتاری سے جا رہی تھی۔ انہوں نے بتایا کہ حادثے میں 3 اطالوی فوجی ہلاک ہوئے ہیں۔ اطالوی وزارت دفاع نے کہا کہ افغانستان میں 3 اطالوی فوجیوں کی حادثاتی اموات پر اطالوی صدر جیورجیو نیپولیٹانو نے ان کے خاندانوں سے گہرے دکھ اور غم کا اظہار کیا ہے۔ واضح رہے کہ افغانستان میں اس وقت 3800 اطالوی فوجی اتحادی فوج کا حصہ ہیں۔

ميمو گيٹ اسکينڈل ميں حسين حقاني کے وکيل کو بھي لندن کاويزا مل گيا

bukhari — Tue, 21 Feb 2012 07:40:50 +0000

اسلام آباد …اسلام آباد ميں برطانوي ہائي کميشن نے ميموگيٹ کيس ميں سابق سفير حسين حقاني کے وکيل زاہد بخاري اور ان کے دو معاون وکلاء کو ويزے جاري کر ديئے ہيں. ميمو گيٹ اسکينڈل کے مرکزي کردار منصور اعجاز کے بيان پر جرح کے ليے زاہدبخاري نے وڈيو لنک پر انحصار کي بجائے خود لندن جانے کا فيصلہ کيا تھا ، ميموکميشن نے بائيس فروري کو لندن سے ويڈيولنک کے ذريعے منصور اعجاز کا بيان رکارڈ کرنے کا فيصلہ کيا تھا، زاہد بخاري نے لندن جانے کے لئے ويزے کے حصول کي درخواست دے رکھي تھي. زاہد بخاري نے جيو نيوز کو بتايا کہ انہيں آج ہائي کميشن آکر ويزا حاصل کرنے کا پيغام ملا ہے، حسين حقاني کے وکيل کا کہنا ہے کہ ويزا ملنے ميں کافي تاخير ہو گئي ہے. اب لندن روانگي کے ليے سفري انتظام بھي کرنا ہے،زاہد بخاري نے بتاياکہ انکي ليگل ٹيم ميں شامل دو معاونين کو بھي ويزے جاري کيے گئے ہيں جو ان کے ساتھ برطانيہ جائيں گے ، ديگر دو معاونين اسلام آباد ميں ميمو کميشن کے اجلاس ميں شرکت کريں گے،ميمو کميشن کل دن دو بجے کارروائي کا آغاز کرتے ہوئے، منصوراعجاز کا وڈيولنک کے ذريعے شہادت قلم بند کرے گا.

زخموں کی زنجیر….چوراہا …حسن نثار

bukhari — Mon, 20 Feb 2012 08:00:30 +0000

رات کے پچھلے پہر جب نیند ٹوٹ جاتی ہے بلکہ سچ یہ ہے کہ روٹھ جاتی ہے تو میں چادر اوڑھ کر اپنے ہی گھر میں کسی آوارہ، اجنبی، بے قرار اوربھٹکی ہوئی روح کی طرح ادھر ادھر پھرتا رہتا ہوں۔ کبھی ایک بالکنی کبھی دوسری بالکنی پر جہاں سے قبرستان صاف دکھائی دیتا ہے اور کبھی تیسری منزل کی چھت پر جہاں سے ستارے اور سندر سٹیٹ کی روشنیاں قریب دکھائی دیتی ہیں۔ تب جب پو پھٹتی ہے تو مسجدوں کے مینار اور اکلوتا چرچ بھی اپنے رخ سے نقاب سرکانے لگتے ہیں پھر امریکہ کی مٹی میں آسودہ خاک عدیم ہاشمی یاد آنے لگتا ہے جس نے کہا تھا
چڑھا جو چھت پہ تو مینار بھی نظر آئے
چھپا دئیے تھے گھروں نے خدا کے گھر کیسے
یہ جو آپ اکثر نیند ٹوٹ اور روٹھ جاتی ہے تو اس کی پیش گوئی میں نے جوانی میں ہی کردی تھی۔
اس لئے تو ہم اکثر رتجگے مناتے ہیں
جن کو نیند آتی ہو ان کو خواب آتے ہیں
بند آنکھوں کے خواب پریشان کرتے ہیں تو کھلی آنکھوں کے خواب کہیں زیادہ ہانٹ کرتے ہیں۔ چادر کی بکل میں ٹھٹھرتے ہوئے میں ان مختلف خوابوں کے درمیان پنڈولم کی طرح بے بسی سے جھولتا رہتا ہوں۔ زندگی بن مانگے ہی مل جاتی ہے اور پھر بن چاہے ہی چھن جاتی ہے۔ ہر نیازخم پرانے سارے زخم تازہ کردیتا ہے جن سے خون کی برسات شروع ہوجاتی ہے اور روح کا آنگن جل تھل اور رنگین ہوجاتا ہے……اس روح کا جو رات کے پچھلے پہر اپنے ہی گھر میں روتی بالکنی اور بھٹکتی پھرتی ہے … ہائے یہ رفتگاں کی یاد!
گزرے کل کے اخبارات میں اک چھوٹی سی خبر کا عنوان تھا……”افضال شاہد اور اظہر جاوید کے لئے تعزیتی ریفرنس “یعنی اوپر نیچے یہ دونوں بھی داستان ہوگئے اسی لئے تو کہتا ہوں کہ ہر نیا زخم نجانے کتنے پرانے زخم ہرے کردیتا ہے، زخموں کی زنجیر لمبی ہوئی جاتی ہے۔
”عبرت سرائے دہر ہے اور ہم ہیں دوستو“
افضال شاہد میرا ہم عمر شاگرد مجھے ہمیشہ ”استاد“ کہا کرتا اور اس کے پروٹوکول نے مجھے جوانی میں ہی بزرگ بنادیا تھا جبکہ”تخلیق“ کا مدیر اظہر جاوید مجھ سے بہت سینئر تھا اور اس کے ساتھ میرا تعلق صرف سلام دعا تک محدود تھا لیکن چالیس سالوں پر محیط سلام دعا والا تعلق بھی اچانک چھن جائے تو مجھ جیسا جذباتی جانور ادھ موا سا ہوجاتا ہے۔ اب یہ دیوانے پھر کبھی دکھائی نہ دیں گے جنہوں نے اپنی پوری زندگیاں کاغذ اور قلم کے قدموں میں قربان کردیں … صرف ایک تعزیتی ریفرنس یا دو ڈھائی کالموں کے لئے … نہ مال غنیمت نہ کشور کشائی، چپ چاپ آئے، ادب کے بے فیض کار خیر میں اپنا حصہ ڈالا، دامن جھاڑے جام الٹائے اور سرشام چپکے سے رخصت ہوگئے۔ افضال شاہد اور اظہر جاوید کی رخصتی نے میرے زخموں کی زنجیر کومزید بوجھل اور طویل کردیا ہے۔ سکول، کالج، یونیورسٹی اور عملی زندگی کے وہ تمام دوست جو بچھڑ چکے، ان کے چہرے میری آنکھوں اور آوازیں میری سماعتوں پر اوور لیپ کررہی ہیں اور وہ قطار درقطار دھندلے افق کے اس پار سے مجھے بے چین و بے قرار دیکھ کر مسکرارہے ہیں۔سکول کے دنوں کا صفدر سعید، خلیل اور نصرت فتح علی خان، نصرت کا بھائی اور راحت کا والد فرخ، نذیر ناجی صاحب کا چھوٹا بھائی اور میرا بڑے بھائیوں جیسا ٹیچر ضمیر جو پی ایم ا ے میں پاسنگ آؤٹ کے موقع پر شہید ہوگیا، کالج کا دوست حسیب جو ائیر فورس جوائن کرنے کے بعد بھری جوانی میں ائیر کریش میں شہید ہوگیا، پھر یونیورسٹی کے پیارے خواجہ سلیم، میاں اشرف، امتیاز تاجی، جاوید بائی گاڈ، یوسف شنواری، ن م راشد صاحب کا بیٹا شہریاراشد ،مقبول ملک، راشد بٹ، طارق جاوید جان …… عملی زندگی کے بے حد قریبی انعام الرحیم، میجر جاوید امین، خواجہ سرفراز، امجد جاوید اور اگر ادب و شو بزنس کے حوالہ سے ذکر کروں تو الف لیلة و لیلة کھل جائے …… احمد ندیم قاسمی صاحب سے لے کر اے حمید تک، منیر نیازی سے لے کر حمید اختر تک، احمد بشیر سے لے کر انیس ناگ تک، اخلاق احمد دہلوی سے لے کر یونس ادیب تک، بابا ظہیر کاشمیری سے لے کر اقبال ساجد تک، سارہ شگفتہ سے لے کر سعیدہ ہاشمی تک، امانت علی خان سے لے کر پرویز مہدی تک، سنتوش بھائی اور درپن بھائی سے لے کر وحید مراد تک، محمد علی سے لے کر سلیم ناصر اورظل سبحان تک…… یہ داستان نہ بیان ہوسکتی ہے نہ برداشت ہوسکتی ہے۔زندگی کے اس بے گناہ قیدی کے زخموں کی زنجیر بہت بھاری اور طویل تر ہوچلی ہے۔ چند روز پہلے حفیظ خان، سید پرویز حسین المعروف پیجا ہانگ کانگ، امیر افضل اور میں ”ہانسی حویلی“ میں دھوپ اوڑھے کیمپس کا زمانہ یاد کررہے تھے جب اچانک میرے منہ سے نکلا…”دوستیوں نے میری زندگی عذاب کردی ہے سمجھ نہیں آتی بچھڑے دوستوں کا سوگ مناؤں یا موجو د دوستوں کو ا نجوائے کروں“تو پیجی شاہ نے بے ساختگی سے کہا………”آؤ مل کر دونوں کام ساتھ ساتھ کرتے ہیں“ زحموں کی زنجیر سنبھالے زندگی کا یہ بے گناہ قیدی ایک رتجگے کے زندان سے دوسرے رتجگے کے زندان کی طرف روانہ ہوتا ہے اور اس دعا کے ساتھ کہ …… بچھڑے ہوئے ساتھیو!جہاں بھی ہو خوش رہو، زندہ رہو …… مری یادوں میں“

بے خوابی کا علاج، مصروف زندگی

bukhari — Mon, 20 Feb 2012 07:57:53 +0000

اسلام آباد: بے خوابی کے علاج کیلئے متاثرہ شخص کو اپنے اردگرد کے ماحول کو اچھا اور خود کو معمولات زندگی میں مصروف رکھنا چاہئے۔ ان خیالات کا اظہار ماہر نفسیات عائشہ موکم قریشی نے کیا۔ انہوں نے کہا کہ بے خوابی کی کئی اقسام ہیں جیسے ابتدائی اور مختصر جزو وقتی بے خوابی، وقفے وقفے سے نیند کا نہ آنا بے خوابی کی انتہائی شدید صورتحال ہے جس کے دوران مریض معمول کے سونے کے وقت میں کبھی صحیح طرح سے نہیں سوسکتا۔ انہوں نے کہا کہ بے خوابی کا علاج ہر شخص کیلئے علیحدہ علیحدہ ہوتا ہے۔ بے خوابی کی بیماری ابتدائی طور پر ڈپریشن کی وجہ سے ہوتی ہے اور بعض اوقات یہ خود پر مسلط کی ہوئی ہوتی ہے۔ انہوں نے کہا کہ یہ ایک انتشار کی صورت ہے جس کے دوران کوئی شخص کام کی زیادتی کے باعث یا تنائو کے ماحول میں معمول کے مطابق اپنی نیند نہیں لے سکتا اور جن ڈاکٹر سے علاج کرانا ضروری ہے۔ انہوں نے بے خوابی کے مریضوں کو ہدایت کی کہ وہ اپنے طور پر خود تشخیص کردہ ادویات کا استعمال نہ کریں جس کے صحت پر منفی اثرات ہوسکتے ہیں۔ اس کے علاوہ مریض ان کا عادی بھی ہوسکتا ہے۔ انہوں نے کہا کہ ایسے خیالات جن سے نیند متاثر ہو سب سے پہلے انہیں جھٹک دینا چاہتے جس سے بیماری کا علاج بغیر ادویات کے ہو جائے گا۔ انہوں نے بتایا کہ مردوں کے مقابلے میں خواتین بے خوابی سے زیادہ متاثر ہوتی ہیں اور بڑی عمر کے لوگوں میں یہ بیماری عام ہوتی ہے جبکہ وہ تنہا زندگی گزار رہے ہیں۔ انہوں نے کہا کہ سونے سے قبل غیر ضروری ادویات جیسے کہ وٹامنز کا استعمال نہیں کرنا چاہئے وٹامنز وغیرہ کو ان کے وقت لینا چاہئے۔ انہوں نے اچھی بھرپور نیند کیلئے کچھ تدابیر بھی بتائیں جن کو اپنے سے بے خوابی کا علاج ممکن ہے۔ ان کے مطابق سونے کا کوئی قرینہ یا ترتیب بنائی جائے۔ کافی اور کیفین کے استعمال سے گریز کیا جائے۔ انہوں نے کہا کہ خود کو کسی کام میں مصروف رکھا جائے اور تھکن کی وجہ سے اچھی اور بھرپور نیند آتی ہے اور جب دوسرے سوجائیں تو سونے کی کوشش کی جائے

روزہ دماغی امراض سے بچائو

bukhari — Mon, 20 Feb 2012 07:54:44 +0000

واشنگٹن: امریکی طبی ماہرین نے کہا ہے کہ روزے دماغی بیماریوں سے محفوظ رکھتے ہیں۔ امریکی جریدے میں شائع ہونے والی ایک رپورٹ کے مطابق امریکی طبی ماہرین نے کہا ہے کہ تحقیق کے مطابق مختلف دورانیے کے روزے رکھنے سے انسانی دماغ کی قوت بڑھتی ہے۔ ماہرین کا مزید کہنا ہے کہ تحقیق سے یہ بات ثابت ہوتی ہے کہ ہفتے میں دو یا تین دن کھانے سے گریز کرنے سے دماغ الزائمر، پارکنسن اور دوسری بیماریوں کے خلاف لڑائی میں خاطر خواہ قوت مدافعت کا مظاہرہ کرتا ہے۔